باڑہ: پاکستان عوامی انقلابی لیگ کی نومنتخب کابینہ کی حلف برداری، پارٹی منشور “(ایک متبادل نظامِ حکومت)” پیش، تیراہ متاثرین کے مسائل کے حل کے لیے حکومت کو ایک ماہ کی مہلت
پاکستان عوامی انقلابی لیگ کے زیرِ اہتمام ڈسٹرکٹ پریس کلب باڑہ میں ایک پرعزم اور تاریخی تقریبِ حلف برداری منعقد ہوئی، جس میں تحصیل باڑہ انقلابی کونسل کی نومنتخب کابینہ نے اپنے عہدوں کا حلف اٹھایا۔

تقریب میں پارٹی کے مرکزی قائدین، کارکنان، نوجوانوں اور علاقے کے معززین نے شرکت کی۔ اس موقع پر پاکستان عوامی انقلابی لیگ کا سیاسی منشور “ایک متبادل نظامِ حکومت” بھی پیش کیا گیا، جس میں ملک کے موجودہ انتظامی، سیاسی اور حکومتی ڈھانچے میں بنیادی اصلاحات اور ایک نئے نظام کے قیام کا خاکہ پیش کیا گیا۔

ناکام نظام کے خاتمے اور نئے نظام کے قیام کا عزم

مرکزی قیادت نے خطاب کرتے ہوئے کہا کہ ملک کا موجودہ نظام عوامی مسائل کے حل میں ناکام ہو چکا ہے، جہاں عام شہری بنیادی سہولیات، انصاف اور مؤثر حکمرانی کے لیے مسلسل مشکلات کا شکار ہیں۔

انہوں نے کہا کہ وقت کا تقاضا ہے کہ ایک ایسا متبادل نظامِ حکومت تشکیل دیا جائے جس میں اختیارات نچلی سطح تک منتقل ہوں، ادارے عوام کے جوابدہ ہوں اور ریاستی فیصلے عوامی مفاد کو سامنے رکھ کر کیے جائیں۔

پاکستان عوامی انقلابی لیگ کی قیادت نے واضح کیا کہ پارٹی کا مقصد صرف سیاسی تبدیلی نہیں بلکہ ایک ایسی انقلابی اصلاحی جدوجہد ہے جس کے ذریعے ملک میں انصاف، شفافیت اور حقیقی عوامی نمائندگی کو یقینی بنایا جا سکے۔

نومنتخب کابینہ پر اعتماد کا اظہار

تقریب کے مہمانِ خصوصی پاکستان عوامی انقلابی لیگ کے چیئرمین حاجی زرباد خان افریدی اور مرکزی صدر ملک عطاء اللہ خان تھے، جنہوں نے نومنتخب عہدیداروں سے حلف لیا۔

بعد ازاں قیادت نے نومنتخب کابینہ کو پارٹی مفلر پہنائے اور انہیں ذمہ داریاں سنبھالنے پر مبارکباد دی۔ انہوں نے امید ظاہر کی کہ نئی کابینہ پارٹی کے نظریات اور عوامی حقوق کی جدوجہد کو مزید مضبوط بنائے گی۔

تیراہ متاثرین کے حق میں دوٹوک اعلان

تقریب کے دوران رہنماؤں پاٹی صدر ملک عطاء اللہ آفریدی نے تیراہ کے متاثرین کو درپیش مسائل پر سخت تشویش کا اظہار کیا۔ انہوں نے کہا کہ اپنے گھروں سے محروم خاندان آج بھی مشکلات، بے یقینی اور بنیادی سہولیات کی کمی کا سامنا کر رہے ہیں، جو ایک بڑا انسانی مسئلہ ہے۔

انہوں نے وفاقی و صوبائی حکومت اور متعلقہ اداروں سے مطالبہ کیا کہ تیراہ متاثرین کی بحالی، نقصانات کے ازالے اور مستقل حل کے لیے فوری عملی اقدامات کیے جائیں۔

عطاء اللہ آفریدی نے کہا:

“حکومت اور متعلقہ اداروں کو ایک ماہ کے اندر تیراہ متاثرین کے مسائل کے حل کے لیے واضح اور عملی فارمولا دینا ہوگا۔ اگر متاثرین کو ان کا جائز حق نہ ملا تو عوامی آواز کو مزید مضبوط انداز میں بلند کیا جائے گا۔ عوام اب صرف وعدے نہیں بلکہ عملی اقدامات چاہتے ہیں۔”

تقریب کے اختتام پر نومنتخب کابینہ نے اس عزم کا اظہار کیا کہ وہ عوامی حقوق، انصاف اور بہتر مستقبل کے لیے پارٹی منشور کے مطابق جدوجہد جاری رکھیں گے۔